Euskal Herria-Palestina Sarea

Oinarrizko testua

Euskal Herria-Palestina SareaZer da?
Euskal Herria Palestina Sarea Palestinarekin elkartasuna (boikot desinbertsio eta zigorrak (Boycott, Divestment and Sanctions, BDS) mugimenduak markatzen duen ildoan jorratu nahi dugunon euskal bilgunea da.

  • BDS mugimendua Palestinan sortzen den deialdia da, bertan, 1948an Israelgo estatua sortu zenetik hona Palestinaren egoera etengabe txarrera joan dela iritzita (palestinar lurraren murrizketa: 1948an %48, gaur egun %12, Israelen bizi diren palestinarren gaineko apartheid-a, Gaza eta Zisjordaniaren okupazio kolonial-militarra, apartheid harresia, olibondoen erauzketa, ur-iturrien lapurreta....) eta honen aurrean 'nazioarteko komunitatea' deritzanak erakusten duen israelekiko konplizitatea aintzat hartuta, munduko herrietako gizarte zibilari egindako eskaera da: Israelgo estatuari boikota, desinbertsioa eta isunen kanpaina bat egitea, Apartheidaren Sudafrika haren aurka egin zenaren antzean. Kanpaina hau palestinar gizarte zibileko 200 baino gehiago elkartek, GKE-k eta gizarte taldek babesten du, bai eta palestinar kulturgile, kirolari eta profesional askok ere. (Informazio gehiago: Global BDS Movement).
  • Euskal Herria da gure lan-eremua, BDS mugimendua herrika antolatzen ari baita eta gure herria Euskal Herria delako. Beraz, Euskal Herriko gizarte eragile, alderdi politiko, kulturgile, irakaskuntza aktore, kirolari eta abarrekin kanpaina honen berri eman eta beraiekin batera arloz arlo dinamizatzea helburu hartzen dugu. Jakina, munduan BDSarekin bat lanean ari diren gainontzeko eragileekin elkarlana sustatzeko asmoa ere badugu.

Zergatik orain?
BDS mugimendua orain dela 5 urte sortu zenetik hona, zorionez, gero eta ezagunagoa eta zabalagoa da eta gero eta eragile gehiagok bat egiten du berarekin.

  • Munduko txoko askotan gertatu dira ekintza 'handiak': israeldar ontziak porturatzen utzi ez izana, teniseko Davis Kopako partidak (Israel/Suedia) ateak itxirik jokatu behar izana, nazioarteko gero eta artista gehiagok Israelen aritzeari muzin egin izana, zenbait entrepresak Israelen negozioak egitea bertan behera utzi izana, zenbait herri-instituziok eta unibertsitatek Israelekiko harremanik izateari uko egin izana, nazioartean israeldar kirol edo kultur ordezkariek gero eta presio handiagoa somatu izana...
  • Euskal Herrian ere, hasieran zenbait eragile internazionalistak baino ez bazuten bultzatzen kanpaina hau, gaur egun politika, irakaskuntza, kultur edo kirol arloetan babes handiak dauzka eta berau bultzatu nahi duen lagun asko. Horregatik denontzako erreferentzia eta topagune izango den bilgune hau eraikitzea proposatzen dugu. Urrats berriak eman ahal izateko.

Aintzat eta balekotzat jotzen dugu orain arte 'Israeli boikot euskal ekimena'-k egindako lana eta aldarrikapena ere. Oraingo proposamena ekimen haren bersortze bezala ulertzen dugu.

Nola osatzen da?
BDS mugimenduak berak markatzen du zeintzuk arlo jorratu beharko liratekeen, horren euskal herriratzea besterik ez dugu proposatzen hemen: 5 komisio eta batzorde eragile bat osatzea, alegia. Komisio bakoitzak markatu beharko ditu bere plangintza eta lan-ildoak, zein helburu lortu nahi dituen..

  1. Insituzioak/alderdiak: Hemen sartzen da politika arloa: boikot, desinbertsio eta isunen kanpaina arlo politikoan jorratzea, instituzioetan eta instituzioen mende ari diren gainontzeko guneetan. Bai eta palestinar herriekin egiten diren senidetzeak, edota egon litezkeen elkarlan, hitzarmen edo laguntzak...
  2. Irakaskuntza: Euskal Herriko eskola, lizeo, unibertsitate eta abarretan BDS kanpaina aurrera ateratzea.
  3. Kirola/Kultura: Euskal Herriko kultur eta kirol eragileengan kanpaina zabaldu eta ekimenak sortzea palestinar eragileekin ere.
  4. Langileria: Entrepresa eta langileria munduan oro har kanpaina honen garatzea.
  5. Erantzuna: Euskal Herrian gertatzen diren presentzia sionisten aurrean erantzutearen ardura.